Katong pindah ka tampa baru tu sekitar taong delapan puluh ampat. Atau mungkin awal dalapan lima kapa. Sebelumnya katorang tinggal di rumah panjang, akang pung nama bagitu. Barangkat dari kampong masih kacil jadi seng talalu mangarti masa kacil di kampong. Dolo katong pindah ka ambon iko orangtua pindah. Kalo beta mulai sakolah di kota ambon. Beta dolo sakolah di SD inpres karang panjang. Tapi mau bicara soal sakolah nanti saja, karna beta ada mau carita tentang beta pung tampa tinggal. Beberapa bulan sebelum katong pindah, antua bapa su mulai pi pacul itu tampa, antua karja akang itu tanah sandiri, seng ada yang bantu. Antua mulai gali tanah yang sebagian terdiri atas pasir gunung dan tanah merah. Antua karja malam hari karna pagi sampe sore karja di kantor, jadi begitu sudah. Waktu katong masuk ke rumah baru itu, seng ada acara macam-macam, langsung masuk saja. Itu rumah dari tanah yang bagimana akang pung campuran untuk tembok, lalu pake triplek di dinding atas. Rumah sederhana dan katong barapa banyak orang yang tinggal di akang pung dalam. Balom banyak orang yang tinggal di sekitar katong pung tampat. Masih alami dan sangat segar di sekitar lingkungan rumah. Orang tua dong ada batanam pisang, kasbi, papaya, cili, nangka, rambutan, durian, jambu, deng masi banyak lagi. Dia pung lokasi cukup luas. Beta masih ingat, di depan rumah tu ada tanam bunga nusa indah warna merah, paling cantik sakali. Di katong pung lokasi itu sudah beberapa kali bongkar, pernah ada Kejadian kalo ada suara ringkikan kuda yang kemungkinan kereta kencana, katanya bagitu, hal mistik. Iyo, abis masih daerah baru to. Jalan pi rumah tu ada trap-trap tanah menurun dari kantor Statistik. Paleng sanang sakali e kalo bajalan lewat situ, ada orang Jawa yang tinggal persis di ujung kantor Statistik, biasa disapa Bu Le, dia pung suami karja di kota, dia pung anak dong kayaknya satu angkatan deng beta. Tapi beberapa taon kemudian dorang pindah ka arah Ahuru sana. Walau katong di kolam sempe, tapi orang dong tau katong deng ana-ana Pule. Tinggal di lokasi yang dekat dengan alam, bikin beta sangat bergantung dengan suasana alam. Basudara dong gali parigi untuk cari air, lalu dapa sumur yang masih dipake sampe sakarang. Akang pung tampa tu paling gaga sakali e, air mangalir sampe di air kaki setan, di arah sekip atas. Jaman itu katong biasa barmaeng layang-layang kalo pas akang pung musim, yang paleng asik tu kalo layang-layang putus, katong barame-rame lari pi cari akang. Malahan sampe pada berebutan. Atau ada juga main bom-bom tanah, itu dibuat dari pasir gunung, dibentuk kayak bulatan besar bagiti, abis itu dijemur di panas matahari atau dipanggang di api. Ada lai katong pung permainan tembak-tembakan dari bambu yang ditaruh buah campoka sebagai akang pung peluru. Ada juga kebiasaan pi mandi di Arbes, tapi jalan sama-sama deng kawan kawan dong, kadang melewati jalur hutan yang dipenuhi dengan tanaman buah, misalnya gandaria, langsat,rambutan, duku, dan kecapi, karna ada tamang yang pung kabong di hutan, jadi pas kalo musim buah katong dapa jatah makan buah sampe bodo, hahaha. Lalu katong seng sakolah ka. Waktu SD Katong sakolah batukar deng sekolah lain, karena ada dua SD di satu tampa. Kalo seng sakolah, katong isi deng balajar kalompok deng barmaeng. Itu saat tu memang paling berkesan. Samua batasibuk deng urusan rohani juga, sebagaimana katong ju ada ana-ana tunas, remaja dan pemuda. Waktu kacil banyak dipake untuk berlatih dan belajar. Kalo ada waktu luang, bisa jalan jalan deng rombongan tamang pi di pante, kayak Natsepa atau Namalatu.
No comments:
Post a Comment