Susah voor tidor

Basudara dong samua, beta mangkali ada banya pikiran ka apa e. Beberapa hari ni beta rasa susah tidor. Mau tidor malam sa pung susah jua, sampe jam dua pagi baru bisa tidor. Tapi beta harus bangun tempo karna musti siap par kelas online di jam dalapan. Beta terganggu deng situasi sakarang ini. Satu dunia ada pusing deng pandemi Covid-19. Samua hal mulai berubah palan-palan. Orang jua mulai berubah, dolo biasa bakudapa baciong atau bajabat tangan, tapi sakarang itu barang lagi dibatasi atau dilarang sudah kalo beta mau bilang. Kebiasaan juga mulai ikut sesuaikan deng keadaan to. Karja dari rumah, atau kalo macam beta ni karja dari kamar kost sa. Kalo pi mangajar di luar rumah harus rapi, mau urusan kaluar pi ketemu deng urusan kantor ka gereja ka atau jalan-jalan di saputaran kota musti bagaya neces, sudah biasa. Kini itu tabiat masih sama, karna mungkin balom lama ka apa. Cuman lama-lama jadi rasa asing sandiri, beta pikir, beta ni su talalu bikin repot sa deng siap diri rapi-rapi, padahal nanti karja dari rumah saja mo. Kesibukan sakarang itu kan mangajar saja par banya. Beta rasa kalo beta seng tampil rapi untuk siap karja, seperti kurang samangat atau inspirasi. Pernah beta coba untuk hanya cuci muka pagi sa, abis itu mulai siap bahan untuk upload ke jaringan, tapi baru sapuluh menit sa, su rasa manganto kayak ada baru abis karja kabong saja. Hahahae. Jadi, itu hal yang biking kadang pastiu lai. Beta masih butuh adaptasi barang beberapa minggu lai. Lagian beta pung tulisan di blog juga sudah lama seng posting. Padahal su rencana kalo mau bikin menulis sebagai gaya hidup harian. Adooooo. Jang mara bu deng usi dong, beta masih banya kekurangan jadi mohon maaf saja, balom bisa disiplin ini.  Disini su amper tenga malam, sunyi sakali, seng ada suara yang biasa baribut, dunia su senyap. Bae sudah to kalo orang dong seng talalu banya kaluar malam untuk sementara, karna angka kajahatan juga naik deng adanya banya aktivitas tenga-tenga malam. Katong samua berdoa saja supaya badai Corona ini cepat berlalu. Beta su rindu deng beta pung hobi naik sepeda kaliling kota, jadi nanti bisa barenti di tampa-tampa singgah untuk santai sambil menikmati alam.